ചെന്ത്രാപ്പിന്നിയിൽ നിന്നും മുള്ളൻപന്നിയെ പിടികൂടി

ചെന്ത്രാപ്പിന്നിയിൽ നിന്നും മുള്ളൻപന്നിയെ പിടികൂടി. ഹലുവ ത്തെരുവ് മദ്രസക്ക് സമീപം സ്വകാര്യ വ്യക്തിയുടെ വീട്ടിലേക്കുള്ള വഴിയിലാണ് രാത്രി ഏഴ് മണിയോടെ മുള്ളൻപന്നിയെ കണ്ടത്. ഉടൻ തന്നെ നാട്ടുകാരുടെ നേതൃത്വത്തിൽ മതിൽക്കെട്ടിനുള്ളിലെ വഴിയടച്ച് മുള്ളൻപന്നിയെ തടഞ്ഞു വെച്ചു. തുടർന്ന് കൂളിമുട്ടം സ്വദേശി അൻസാരിയെത്തി മുള്ളൻ പന്നിയെ പിടികൂടി. ഏകദേശം 20 കിലോയോളം തൂക്കമുള്ള മുള്ളൻ പന്നിയെയാണ് പിടികൂടിയത്. സംഭവമറിഞ്ഞ് നിരവധി പേർ സ്ഥലത്ത് തടിച്ചു കൂടി. രാവിലെ മുതൽ പ്രദേശത്ത് മുള്ളൻ പന്നിയെ കണ്ടു വന്നിരുന്നതായി നാട്ടുകാർ പറയുന്നു.
ചാലക്കുടിയിൽ നിന്ന് ഫോറസ്റ്റ് അധികൃതർ എത്തി മുള്ളൻ പന്നിയെ കൊണ്ടുപോയി. ഒരു മാസം മുമ്പ് മതിലകം നെടുംപറമ്പ് മേഖലയിൽ നിന്നും മുള്ളൻ പന്നിയെ പിടികൂടിയിരുന്നു.