ശ്രീനാരായണപുരം: തീരദേശ മേഖലയിലുണ്ടായ ശക്തമായ ഇടിമിന്നലിൽ ശ്രീനാരായണപുരം താണിയൻ ബസാറിൽ വീടിന് വ്യാപക നാശനഷ്ടം. ശ്രീനാരായണപുരം ഗ്രാമപഞ്ചായത്തിലെ 21-ാം വാർഡിൽ താമസിക്കുന്ന മുണ്ടഞ്ചേരി വിജയലക്ഷ്മി വേണുഗോപാലിന്റെ വാർക്ക വീട്ടിലാണ് സംഭവം നടന്നത്.
ഇന്ന് രാവിലെയുണ്ടായ അതിശക്തമായ ഇടിവെട്ടിലാണ് ഹാളിൽ നിന്നും മുറിയിലേക്ക് പ്രവേശിക്കുന്ന ഭാഗത്തെ തറയിലെ ടൈലുകൾ പൂർണ്ണമായും പൊട്ടിത്തെറിച്ചത്. ഇടിമിന്നലിന്റെ ആഘാതത്തിൽ വീടിന്റെ മുൻഭാഗത്ത് പ്രവർത്തിക്കാതെ കിടന്നിരുന്ന ഏഴോളം ലൈറ്റുകൾ കത്തിനശിച്ചു. കൂടാതെ രണ്ട് ഫാനുകൾ, വിവിധ പ്ലഗ് പോയിന്റുകൾ, ഡിബി ബോക്സ് (DB Box) എന്നിവയും പൂർണ്ണമായി കരിഞ്ഞുപോയിട്ടുണ്ട്. ഇലക്ട്രിക് വയറിങ്ങും ബൾബുകളും പൊട്ടിത്തെറിച്ച് വടക്കേ പറമ്പിലേക്ക് വരെ തെറിച്ചുവീണതായി വീട്ടുകാർ പറഞ്ഞു.
ഏകദേശം മൂന്ന് വർഷം മുൻപ് മാത്രം നിർമ്മിച്ച പുതിയ വീടാണിത്. സംഭവസമയത്ത് വീട്ടിൽ ആളുകൾ ഉണ്ടായിരുന്നെങ്കിലും ഭാഗ്യം കൊണ്ടാണ് ആർക്കും പരിക്കേൽക്കാതിരുന്നത്. എന്നാൽ ഇടിവെട്ടിന്റെ കഠിനമായ ശബ്ദം കാരണം വീട്ടിലുണ്ടായിരുന്നവർക്ക് ശാരീരിക അസ്വസ്ഥതകൾ (ചെവിവേദന ഉൾപ്പെടെ) അനുഭവപ്പെടുന്നുണ്ട്.
അപകടത്തെക്കുറിച്ച് പഞ്ചായത്ത്, വില്ലേജ് അധികൃതരെ വിവരമറിയിച്ചിട്ടുണ്ട്. പ്രദേശത്തെ തീരദേശ മേഖലകളിൽ ഉണ്ടായ ശക്തമായ ഇടിമിന്നലിൽ മറ്റ് നിരവധി വീടുകളിലും നാശനഷ്ടങ്ങൾ റിപ്പോർട്ട് ചെയ്യപ്പെട്ടിട്ടുണ്ട്
ശക്തമായ ഇടിമിന്നൽ: ശ്രീനാരായണപുരത്ത് വീടിന്റെ ടൈലുകൾ പൊട്ടിത്തെറിച്ചു, വ്യാപക നാശനഷ്ടം
