കൊടുങ്ങല്ലൂർ: അഴീക്കോട് ആഴിമുഖത്ത് ശക്തമായ തിരമാലയിൽപ്പെട്ട് വള്ളം ഉലഞ്ഞ് മൂന്ന് മത്സ്യതൊഴിലാളികൾക്ക് പരിക്കേറ്റു. ‘ശിവശക്തി’ എന്ന വള്ളത്തിലെ തൊഴിലാളികളായ ജനാർദ്ധനൻ, കുഞ്ഞുമോൻ, അഭിലാഷ് എന്നിവർക്കാണ് പരിക്കേറ്റത്.
ഇന്ന് രാവിലെ 11 മണിയോടെയായിരുന്നു അപകടം നടന്നത്. ആഴിമുഖത്തുനിന്നും കടലിലേക്ക് പോകുകയായിരുന്ന വള്ളം വലിയ തിരമാലയിൽപ്പെട്ട് നിയന്ത്രണം വിട്ട് ഉയർന്നു താഴുകയായിരുന്നു. ഈ സമയത്ത് വള്ളത്തിന്റെ മുൻഭാഗത്ത് (അണിയത്ത്) ജോലി ചെയ്യുകയായിരുന്ന തൊഴിലാളികൾ വള്ളത്തിനുള്ളിലെ ഗ്യാപ്പിലേക്ക് തെറിച്ചുവീഴുകയായിരുന്നു.
വീഴ്ചയുടെ ആഘാതത്തിൽ തൊഴിലാളികളിലൊരാളായ ജനാർദ്ധനന്റെ മുഖത്തും കാലിനും ഗുരുതരമായി പരിക്കേറ്റിട്ടുണ്ട്. പരിക്കേറ്റ മൂന്നുപേരെയും ഉടൻ തന്നെ കൊടുങ്ങല്ലൂരിലെ എ.ആർ ആശുപത്രിയിൽ പ്രവേശിപ്പിച്ചു. നിലവിൽ ഇവർ ഇവിടെ ചികിത്സയിലാണ്.
വള്ളം തിരമാലയിൽപ്പെട്ട് ഉലഞ്ഞു; അഴീക്കോട് ആഴിമുഖത്ത് മൂന്ന് മത്സ്യതൊഴിലാളികൾക്ക് പരിക്ക്
