കൈപ്പമംഗലം: കൈപ്പമംഗലം ചിറക്കൽ പള്ളിക്ക് സമീപം മൂന്നാക്കപ്പറമ്പിൽ അബ്ദുൽ റഹ്മാന്റെ വീട്ടിൽ വളർത്തിയിരുന്ന രണ്ട് ആടുകളെ തെരുവുനായ കടിച്ചു പരിക്കേൽപ്പിച്ചു. ഇന്ന് വൈകിട്ടോടെയായിരുന്നു സംഭവം. ആടുകളെ ആക്രമിച്ച ശേഷം റോഡിലിറങ്ങിയ നായ യാത്രക്കാർക്കും വാഹനങ്ങൾക്കും പിന്നാലെ ഓടി പ്രദേശത്ത് ഭീതി പരത്തി.
വിവരമറിഞ്ഞ് പഞ്ചായത്ത് പ്രസിഡന്റ് ബീനാ സുരേന്ദ്രന്റെയും ജനപ്രതിനിധികളുടെയും നേതൃത്വത്തിൽ നാട്ടുകാർ ചേർന്ന് നായയെ കണ്ടെത്തി. തുടർന്ന് തളിക്കുളം ആനിമൽ സ്ക്വാഡ് സ്ഥലത്തെത്തി നായയെ സുരക്ഷിതമായി പിടികൂടുകയായിരുന്നു. അസ്വാഭാവിക പെരുമാറ്റം പ്രകടിപ്പിച്ച നായയ്ക്ക് പേവിഷബാധയുണ്ടോ എന്ന് സംശയമുള്ളതിനാൽ ഇതിനെ പ്രത്യേക കൂട്ടിലേക്ക് മാറ്റി നിരീക്ഷണത്തിലാക്കിയിട്ടുണ്ട്. കടിയേറ്റ ആടുകൾക്ക് ആവശ്യമായ ചികിത്സയും ലഭ്യമാക്കി.
